МАЛЬКОЎСКІ КАСЦЁЛ размяшчаецца ў вёсцы Малькі Браслаўскага раёна Віцебскай вобласці. Пабудаваны ў першай палавіне 20 ст. з дрэва.

Твор народнага дойлідства. Вырашаны прамавугольным у плане зрубам з трохграннай алтарнай часткай, над якой двухсхільны дах пераходзіць у вальмавы. Да правай грані апсіды дыяганальна прырублена нізкая прамавугольная сакрысція. Фасад завершаны трохвугольным франтонам з паўкруглай люкарнай па цэнтры і шырокім адлівам у аснаванні, падтрыманым чатырмя слупамі. Над прамавугольным уваходным праёмам пяцігранны балкончык перад ашклёнымі дзвярыма хораў. Вертыкальна ашаляваныя бакавыя фасады расчлянёны прамавугольнымі аконнымі праёмамі і брусамі-сцяжкамі ў прасценках.