«МЛЫНОК»Галоўная »
«МЛЫНОК» – традыцыйны танец. Называлі таксама «Мельнік». Музычны памер 2/4. Тэмп жвавы. Mae некалькі варыянтаў музыкі, харэаграфіі і прыпевак. Танцоры ў час выканання імітавалі вярчэнне млынавых жорнаў, работу млынара.
У Гомельскай вобласці ў «Мельніку» чацвёра выканаўцаў злучалі ў цэнтры правыя рукі і беглі па крузе, а пад іх рукамі ваўчком круціўся пяты танцор. Часам танцоры голасам перадавалі тарахценне млына. У Лельчыцкім раёне чацвёра выканаўцаў, злучыўшы ў цэнтры левыя рукі, круціліся па крузе, рабілі ўзмахі рукамі над галавой і далучалі іх да левых рук, гэтым самым імітавалі кручэнне лопасцей ветрака. На Віцебшчыне саліст круціўся ў цэнтры хаты ў прысядцы з выцягнутай убок нагой (рух «млын»). На сцэне «Млынок» выконваўся ў пачатку 20 ст. першай беларускай трупай Iгната Буйніцкага.
Крыніца: Этнаграфія Беларусі: энцыклапедыя / Беларуская Савецкая Энцыклапедыя; рэдкалегія: І.П. Шамякін (галоўны рэдактар) [і інш.]. - Мінск: БелСЭ, 1989. - 375 с. Аўтар:Ю.М. Чурко |