НЕМЦАЎ Алесь Гаўрылавіч (29.08.1898 г., Гомель — сакавік 1938 г.) — беларускі краязнавец. Скончыў настаўніцкую семінарыю ў Яраслаўлі (1917), хіміка-біялагічны факультэт Маскоўскага педагагічнага інстытута (1933). Працаваў у Асіповіцкай чыгуначнай школе (1917—38 гг.). Карэспандэнт Цэнтральнага бюро краязнаўства (з 1929 г.).

Вывучаў этнаграфію і фальклор Асіповіцкага раёна. У часопісе «Наш край» змясціў артыкулы: «Вяселле: Запісана ў в. Смык-Слабада Зборскага сельсавета і в. Заручэўе Дзераўцоўскага сельсавета ў студзені-лютым 1927 г.— Асіповіцкага раёна» (1927, № 4), «Спосабы лову жывёл і птушак у Асіповіцкім раёне» (1927, № 5), «Замоскі сельсавет Асіповіцкага раёна Бабруйскай акругі» (1927, № 6—7), «Гута «Камінтэрн»: Месцазнаходжанне і кароткая гісторыя» (1929, № 10), у часопісе «Савецкая краіна» — артыкул «Скарыстаем мясцовую сыравіну (Асіповіцкі раён)» (1932, № 9) і інш.

Твор: Помнікі старасавеччыны ў Асіповіцкім раёне // Асіповіцкі раён Бабруйскай акругі. (Мн., 1928. Вып. 2.).