ПАЛОНКАЎСКІ КАСЦЁЛ МАЦІ БОЖАЙ ШКАПАЛЕРНАЙ размяшчаецца ў заходняй частцы вёскі Палонка Баранавіцкага раёна Брэсцкай вобласці, каля царквы. Пабудаваны ў 1990-я гады з цэглы.

Прамавугольны ў плане аб'ём з трохграннай апсідай, над якой двухсхільны дах пераходзіць у вальмавы. Да левай грані апсіды дыяганальна далучана нізкая сакрысція. Плоскасць фасада завершана двух’яруснай чатырохграннай званіцай. Бакавыя фасады рытмічна расчлянёны арачнымі аконнымі праёмамі, умацаваны контрфорсамі. У адным архітэктурным стылі вырашана арачная брама.