ПРЫВАЛКАЎСКІ КАСЦЁЛ ЮДЫ ТАДЭВУША размяшчаецца ў цэтнры вёскі Прывалка Гродзенскага раёна. Пабудаваны ў 1918 годзе з дрэва на месцы храма 19 стагоддзя. На 1997 год налічвалася 316 парафіян.

Помнік архітэктуры неаготыкі. Вырашаны магутным прамавугольным у плане аб'ёмам, алтарную групу якога складаюць бакавыя крылы трансепта і пяцігранная апсіда. Над фасадам узведзены высотныя бакавыя чатырохгранныя вежы-званіцы са спічастымі шпілямі, паміж якімі трохвугольны франтон на прамавугольным атыку (па цэнтры стральчатая ніша з выявай Хрыста). Спічастымі трохвугольнымі франтонамі завершаны крылы трансепта. Бакавыя сцены прарублены высокімі стральчатымі аконнымі праёмамі і ўмацаваны ў прасценках брусамі-сцяжкамі. Вертыкальным каскадам стральчатых праёмаў адзначана вось сіметрыі франтальнага фасада (уваход і два акны).