РАНДЗІЛАЎШЧЫНАЎСКІ КАСЦЁЛ НАЙСВЯЦЕЙШАГА СЭРЦА ІСУСА размяшчаецца паміж вёскамі Рандзілаўшчына і Нянадавічы Дзятлаўскага раёна Гродзенскай вобласці, каля могілак. Пабудаваны ў 1822 годзе з цэглы. Пасля паўстання 1863—64 гадоў закрыты і перададзены праваслаўнай царкве. Зачынены ў 1950-я гг. (прыстасаваны пад магазін), вернуты парафіянам у 1989 годзе, адбудаваны ў 1992 годзе.

Помнік архітэктуры позняга класіцызму. Вырашаны прамавугольным у плане аб'ёмам пад вальмавым дахам. Да пяціграннай апсіды далучана прамавугольная сакрысція. У фасад, крапаваны вуглавымі калонамі, урэзана трох’ярусная чатырохгранная шатровая званіца, верхні ярус якой адкрыты арачнымі прасветамі-біфорыумамі. Плоскасныя бакавыя фасады прарэзаны двумя парамі арачных аконных праёмаў, апяразаны прафіляваным карнізам. Побач пастаўлена мураваная двух’ярусная чатырохгранная званіца адзінай з храмам архітэктурна-стылёвай трактоўкі.