Значная частка экспазіцыі прысвечана старажытнаму Полацку і знакамітым беларускім асветнікам:
Ефрасінні Полацкай, Францыску Скарыне, Сімяону Полацкаму. На фоне арыгіналаў старадрукаў прадстаўлены муляжы страчаных рэліквій нацыянальнай культуры: Друцкае евангелле, «Евангелле» В.Цяпінскага і інш. Экспазіцыя знаёміць з творчасцю беларуска-польскіх пісьменнікаў 18 — 19 ст.: Ф.Князьніна, Я.Баршчэўскага, А.Рыпінскага, А.Вярыгі-Дарэўскага і інш.; рускіх пісьменнікаў, шляхі якіх пралягалі праз Віцебшчыну: А.Пушкіна, М.Гогаля, І.Лажэчнікава, І.Буніна, Г.Успенскага. Рэдкія дакументы і фотаздымкі расказваюць пра Віцебскую філію літаратурнага аб'яднання «Маладняк», пра пісьменнікаў 1920-30-х г.:
Вацлава Ластоўскага, М.Зарэцкага, У.Дубоўку, І.Батрака (Казлоўскага), пра пісьменнікаў, што загінулі ў гады
Вялікай Айчыннай вайны: А.Гейнэ, А.Дубровіча, Р.Жалезняка, А.Жаўрука і інш.
Музей таксама праводзіць часовыя выстаўкі, прысвечаныя ў асноўным сучасным пісьменнікам, значнае месца адводзідца творчасці У.Караткевіча і В.Быкава.