ВЯЛІКАСВІРАНКАЎСКІ КАСЦЁЛ СВЯТОГА МУЧАНІКА ЮРЫЯГалоўная »
ВЯЛІКАСВІРАНКАЎСКІ КАСЦЁЛ СВЯТОГА МУЧАНІКА ЮРЫЯ размяшчаецца на паўднёвай ускраіне вёскі Вялікія Свіранкі Астравецкага раёна. Пабудаваны ў 2-й палавіне 19 ст. Першапачатковы драўляны храм быў збудаваны ў 1671 г. коштам віленскага капітула, у 1690 г. пры ім збудаваны драўляны кляштар місіянераў. Закрыты ў 1951 г., вернуты ў 1998 г. парафіянам, адбудаваны ў 1999 г.
Архітэктура храма надзелена рысамі народнага дойлідства. Выцягнуты па падоўжнай восі прамавугольны зруб з пяціграннай апсідай мае над франтальным фасадам невялікую васьмігранную званічку, што завяршае трохвугольны франтон двухсхільнага даху (вынік прыстасавання касцёла пад царкву). Галоўны фасад фланкіраваны дзвумя прырубамі (асновы бакавых вежаў, не захаваліся), якія выступаюць за плоскасці сцен, але не выходзяць за межы агульнага даху. Паміж імі прыбудаваны нізкі прытвор пад двухсхільным пакрыццём. На фоне гарызантальна-вертыкальнай шалёўкі вылучаюцца лучковыя аконныя праёмы і брусы-сцяжкі ў прасценках. Шалёўка сцен выкарыстана і ў інтэр'еры залы, перакрытай плоскай столлю на падугах і вылучанай карнізам. У бакавых памяшканнях нартэкса вітыя лесвіцы на хоры і паддашша.
На поўдзень ад касцёла ў 1910-я гг. пастаўлена двух'ярусная квадратная ў плане шатровая званіца (зруйнавана ў канцы 20 ст.), ніжні ярус якой быў складзены з валуноў, верхні цагляньі ярус-звон адкрываўся дзвумя паўцыркульнымі прасветамі.
Крыніца: Кулагін А. М. Каталіцкія храмы Беларусі: Энцыкл. даведнік / А. М. Кулагін; фатограф А. Л. Дыбоўскі. — 2-е выд. — Мн.: БелЭн, 2008. — 488 с.: іл.
|