ВЯРЭЙКАЎСКІ КАСЦЁЛ НАЙСВЯЦЕЙШАГА ІМЯ МАРЫІ размяшчаецца ў цэнтры вёскі Вярэйкі Ваўкавыскага раёна Гродзенскай вобласці.

Пабудаваны ў 1826—30(39) гг. з цэглы па фундацыі і на сродкі ўладальніка маёнтка стацкага саветніка Аляксандра Свечына (праваслаўнага). Праект храма быў прысланы з Пецярбурга. Некалькі гадоў цягнулася цяжба з уладамі наконт правамоцтва самавольнага будаўніцтва, якое Свечын абгрунтоўвае тым, што ў Вярэйках з даўніх часоў існаваў касцёл. У 1868 г. касцёл скасаваны і перабудаваны архітэктарам Ціхвінскім у праваслаўную царкву. У 1952 г. закрыты. Адбудаваны як касцёл у 1990 г. На 1997 г. каля 800 парафіян.

Помнік архітэктуры позняга класіцызму. Вырашаны прамавугольным у плане аб'ёмам пад двухсхільным дахам. Фасад вырашаны дарычным чатырохкалонным порцікам з трохвугольным франтонам (адноўлены ў канцы 20 ст.) і дзвумя нішамі-экседрамі са скульптурамі па баках. Першапачаткова па баках фасада былі адасоблена пастаўлены дзве чатырохгранныя васьмікалонныя вежы-званіцы. З перабудовай пад царкву яны былі знесены, порцік заменены прыбудаванай двух'яруснай купальнай званіцай, былі прабіты бакавыя ўваходныя праёмы. Плоскасныя бакавыя фасады рытмічна члянёны прамавугольнымі аконнымі праёмамі з сандрыкамі, па цэнтры — арачнымі ўваходнымі праёмамі. Унутры малітоўная зала перакрыта латковай столлю, апсіду запаўняе стукавы алтар у стылі класіцызму ў выглядзе чатырохпілястравага порціка з трохвугольным франтонам. Пад апсідай крыпта-пахавальня.

Збоку перад храмам пастаўлена трох'ярусная чатырохгранная шатровая званіца, трактаваная ў стылі позняга класіцызму.