ЗААСТРАВЕЧАНСКАЯ КАПЛІЦА СВЯТОЙ ГАННЫ размяшчаецца на могілках за 1 км на ўсход ад вёскі Заастравечча Клецкага раёна Мінскай вобласці. Пабудавана ў 1997 г. з сілікатнай цэглы на месцы папярэдняй драўлянай.

Твор народнага дойлідства. Вырашана прамавугольным у плане аб'ёмам пад двухсхільным дахам з крыжом на фасадзе. Прамавугольны ўваходны праём накрыты двухсхільным казырком на кранштэйнах, над ім рэльефны крыж. Бакавыя фасады расчлянёны дзвумя парамі прамавугольных аконных праёмаў.