АГЛОБЛІ — канструкцыйны элемент гужавых транспартных сродкаў або ворыўных прылад, што служыць для злучэння іх з цяглавай сілай.
Уяўляюць сабой пару жардзін (часцей з бярозы), прымацаваных канцамі да пярэдняй восі
калёс ці да капылоў саней. Пры запрэжцы аглоблі змацоўваюцца з
дугой гужамі ад хамута і рэгулююцца па яе шырыні
атосамі, для мацавання якіх на верхніх канцах аглоблей з унутранага боку ёсць спецыяльныя металічныя насечкі.
У выязных экіпажах аглоблі нярэдка мелі авальны выгін у сярэдняй частцы, што стварала больш прасторы для запрэжанага каня. У сохах
віцебскага і
магілёўскага (падняпроўскага) тыпаў аглоблі (вобжы) рабілі больш кароткімі, утвараючы адзінае цэлае з асноўнай канструкцыяй, да іх канцоў ад хамута мацаваліся пастронкі. Ва Усходнім Палессі сустракалася пастроначная
запрэжка з дадатковай аглобляй, што служыла сродкам тармажэння на спусках.