ДУБАЙСКІ КАСЦЁЛ УЗВЫШЭННЯ СВЯТОГА КРЫЖА абкружаны старажытным паркам і размяшчаецца ў паўднёва-заходняй частцы вёскі Дубай Пінскага раёна Брэсцкай вобласці.

Пабудаваны ў сярэдзіне 18 ст. ў сядзібе пінскіх езуітаў (падаравана князем Альбрэхтам Радзівілам у 1633 г.). У 1773 г. езуіцкая місія ў Дубаі скасавана. У 1784 г. сядзібу і касцёл наведаў польскі кароль Станіслаў Аўгуст Панятоўскі. Рэстаўрыраваны ў 1920 г.

Помнік архітэктуры барока. Васьмігранны цэнтрычны аб'ём накрыты шлемападобным фігурным дахам з гранёным ліхтаром у завяршэнні (у 1990-я гг. заменены на шатровы), па вуглах крапаваны пілястрамі, апяразаны складанымі абломамі. Уваход і апсіда вылучаны паніжанымі прамавугольнымі прыдзеламі з самастойнымі двухсхільнымі пакрыццямі. Купал над уваходным прытворам, вытанчаная прафіліроўка шматслаёвага карніза, а таксама вітражныя лучковыя вокны ўзмацняюць багацце аздаблення будынка. Інтэр'ер быў упрыгожаны фрэскавай размалёўкай; над уваходам хоры на дзвух калонах. Пад храмам скляпеністыя сутарэнні, у якіх былі саркафагі з пахаваннямі.