ГРОДЗЕНСКАЯ КАПЛІЦА размяшчаецца ў горадзе Гродна на вуліцы Перамогі, на каталіцкіх могілках. Пабудавана ў 1854 г. з цэглы і бутавага каменю разам з двух'яруснай шатровай званіцай на сродкі пана Якуба Румеля. У пасляваенныя гады зачынена, у 1990-я гг. адноўлена.

Помнік архітэктуры неакласіцызму. Прамавугольны ў плане аб'ём накрыты двухсхільным дахам з вальмай над алтарнай часткай, узняты на трохступеньчаты стылабат. Галоўны фасад вырашаны чатырохкалонным тасканскім порцікам з трохвугольным франтонам. Пад спрошчаным антаблементам — прамавугольны праём увахода. Плоскія бакавыя фасады (таўшчыня сцен 0,8 м) вылучаны ў цэнтры квадратнымі аконнымі праёмамі. Па перыметры будынка цяга і прафіляваны карніз.

Прамавугольная зала перакрыта плоскай столлю. Над мураваным алтаром — укрыжаванне. Пад алтарнай часткай склеп-пахавальня. Злева ад капліцы пабудавана двух'ярусная шатровая званіца з цэглы (цяпер атынкавана).