КОЛАСА ЯКУБА ЛІТАРАТУРНА-ЭТНАГРАФГЧНЫ МУЗЕЙ адкрыты ў в.Пінкавічы Пінскага раёна 11.11.1990 г. у будынку былой школы, дзе ў 1904—06 гг. працаваў настаўнікам
Якуб Колас. Музеем кіравалі І.І.Калоша, з 2003 г. Н.Р.Палавец.
Будынак Пінкавіцкай школы Асноўны фонд музея (2008) налічвае 368 адзінак захоўвання, дапаможны — 60 адзінак. Плошча экспазіцыі 106 м². У музеі захоўваюцца запісы выступленняў Я.Коласа і яго брата I.Міцкевіча, успаміны пра пісьменніка жыхароў в.Пінкавічы. Экспазіцыя размешчана ў вестыбюлі і 4 залах. У вестыбюлі знаходзіцца бюст Я.Коласа — падарунак
Літаратурна-мемарыяльнага музея Якуба Коласа, на сценах 10 каляровых слайдаў з пейзажамі Пінкавіч. Тут арганізоўваюцца коласаўскія чытанні, конкурсы, выстаўкі, гутаркі.
Экспазіцыя 1-й залы «Сялянская хатка» аформлена ў стылі канца ХІХ — пачатку ХХ ст. У такой хаце жыў Я.Колас, калі прыехаў на працу ў Пінкавічы. Сцены аформлены вышыванымі сюжэтнымі карцінамі, фатаграфіямі старажылаў вёскі ў народным адзенні. Сярод экспанатаў: кухонны посуд, макет печы, ткацкі станок, прасніца,
калаўрот,
адзенне,
лапці, цэп, каменны малаток, альбомы «3 гісторыі вёскі Пінкавічы», «Народныя песні вёскі Пінкавічы».
Экспазіцыя 2-й залы «Якуб Колас у Пінкавічах» прысвечана радзіме пісьменніка, яго вучобе ў Нясвіжскай настаўніцкай семінарыі і прыезду ў Пінкавічы. На галоўным стэндзе размешчаны фотаздымкі маладога Я.Коласа, Пінкавіцкай школы, старожкі Ганны, у якой кватараваў Колас-настаўнік, яе ўспаміны. З архіўных матэрыялаў экспануюцца дакументы пра ўдзел настаўніка Міцкевіча ў сялянскім руху 1905 г. у Пінкавічах, копія «Петыцыі», якую па просьбе сялян напісаў Я.Колас мясцоваму пану Скірмунту. Асобны раздзел прысвечаны вершам, напісаным паэтам у пінкавіцкі перыяд.
Экспазіцыя 3-й залы «Якуб Колас у Пінску» знаёміць з перыядам жыцця паэта пасля яго высылкі з Пінкавіч. Галоўны стэнд расказвае аб працы пісьменніка ў Пінскай 3-й прыходскай школе, яго асабістым жыцці і літаратурнай дзейнасці ў пінскі перыяд. Сярод экспанатаў пераклады твораў Я.Коласа на іншыя мовы свету.
Экспазіцыя «Пінкавічы сёння» прысвечана вёсцы і яе жыхарам. Прадстаўлены матэрыялы аб сучасным стане вёскі, дзейнасці раённага Цэнтра пазашкольнай работы, што знаходзіцца ў в.Пінкавічы. Устаноўлена стэла, прысвечаная воінам, загінуўшым пры вызваленні Піншчыны ад нямецка-фашысцкіх захопнікаў у 1944 г. Асобна экспануюцца фатаграфіі, пісьмы, газеты ваенных часоў, альбомы «Ніхто не забыты, нішто не забыта», «Заўсёды з намі».
Адрас: 225730, Пінскі раён, в.Пінкавічы, вул.Зорная, 12
Тэл.: +375-165-38-02-38