КВАСОЎКАЎСКІ КАСЦЁЛ БЕЗЗАГАНАГА ЗАЧАЦЦЯ НАЙСВЯЦЕЙШАЙ ДЗЕВЫ МАРЫІ размяшчаецца ў цэнтры вёскі Квасоўка Гродзенскага раёна. Пабудаваны ў 1856—72 гг. з цэглы. Закрыты ў 1961 г., вернуты парафіянам у 1989 г.

Помнік архітэктуры позняга класіцызму і рэтраготыкі. Будынак прамавугольны ў плане, накрыты двухсхільным дахам, які пераходзіць у вальмавае пакрыццё над пяціграннай апсідай з бакавымі сакрысціямі. На галоўным фасадзе выступае шатровая чацверыковая са скошанымі вугламі званіца, фланкіраваная арачнымі нішамі. Фасады расчлянёны стральчатымі аконнымі праёмамі і пілястрамі ў прасценках.

Унутраная прастора шасцью слупамі падзелена на тры нефы, цэнтральны з якіх перакрыты драўляным скляпеннем і конхай над апсідай. Над уваходам хоры з балюстраднай агароджай.