ЛІПНІШКАЎСКАЯ КАПЛІЦА размяшчаецца ў цэнтры вёскі Ліпнішкі Іўеўскага раёна Гродзенскай вобласці. Пабудавана ў канцы 19 ст. з цэглы.

Помнік архітэктуры класіцызму. Вырашана чатырохграннай двух’яруснай вежай з шатровым пакрыццём. Першы ярус — маналітны п'едэстал, крапаваны прамавугольнымі нішамі; другі — адкрытае арачнымі прасветамі падценне, пад якім пастаўлена драўляная паліхромная скульптура Хрыста-пакутніка з крыжом. Архітэктурная аздоба атынкаваных граняў — лапаткі з прамавугольнымі філёнгамі, архівольты арак, прафіляваныя карнізы.