МАЗЫРСКАЯ КЕРАМІКА – традыцыйныя вырабы мясцовых
ганчароў 2-й паловы XII – XIX стст., знойдзеныя пры археалагічных раскопках у
Мазыры. Вырабы 2-й паловы XII – XVII стст. (гаршкі, латкі, міскі) шэра- і белагліняныя, аздобленыя стужачным
арнаментам, часам у спалучэнні з серпападобнымі вертыкальнымі і гарызантальнымі насечкамі. Гаршкі часта мелі раўчук на ўнутранай паверхні венчыка, клеймы на донцах у выглядзе 1-й ці некалькіх кругоў, крыжа ў крузе, кола, зігзага, літараў (аналагічныя вядомыя з раскопак на Кіеўшчыне) і інш.
У XII – XIII стст. у Мазыры карысталіся таксама ганчарнымі вырабамі, прывезенымі з Кіева і гарадоў Прычарнамор'я (амфары і інш.).
У XVI – XVIII стст. поруч з шэра- і белагліняным выраблялі чырвонагліняны паліваны (кубкі, талеркі, міскі, збаны, рынкі, макотры,
глякі і інш.) і чорна-задымлены посуд,
кафлю, будаўнічую кераміку, магчыма, курыльныя люлькі. Паліваны посуд аздаблялі шматрадковым стужачным або штампаваным арнаментам.
У ХІХ – ХХ стст. выраблялі белагліняны непаліваны посуд, размаляваны звонку чырвонай глінай, белагліняны посуд, глазураваны знутры.