МАЗЫРСКІ ЗАМАК існаваў у 15 — 18 ст. на гарадзішчы старажытнага Мазыра. Пабудаваны на месцы ўмацаванага драўлянага замка 14 ст. Займаў мыс паміж шырокімі ярамі, якія праразалі высокі карэнны бераг Прыпяці. У 1520-30-я г. зруйнаваны татарамі. Адноўлены ў 1543 г. Складаўся з 3 вежаў з гароднямі і некалькімі дамамі паміж імі, якія таксама выконвалі абарончую ролю. Пасля перабудовы ў 1576 г. меў 5 вежаў. У 1609 г. цалкам згарэў, у 1613 г. адноўлены. У ходзе ваенных дзеянняў 17 ст. замак неаднойчы быў разбураны і паступова прыйшоў у заняпад.

У 18 ст. Мазырскі замак — парадны замкава-палацавы комплекс, які складаўся з драўлянага палаца ў цэнтры і гаспадарчай зоны. Пры даследаванні на замчышчы выяўлены рэшткі жылой пабудовы 16 ст. з кафлянай печчу, складзенай з гаршковай і каробчатай кафлі, упрыгожанай геаметрычным арнаментам.