МЕАНДР (франц. meandre ад грэч. Maiandros Меандр, старажытная назва ракі Вялікі Мендэрэс у Малой Азіі, якая мае звілістыя берагі) – геаметрычны арнамент у выглядзе ламанай пад прамым вуглом лініі, якая ў цэлым глядзіцца як вузкая паласа.

Распрацаваны і шырока выкарыстоўваўся ў мастацтве Старажытнай Грэцыі (вазапіс, архітэктурны дэкор).

У беларускім мастацтве пашыраны ў пачатку XX ст. у стылі мадэрн: архітэктурны дэкор (фрыз будынка былой мужчынскай гімназіі ў Гомелі), мастацкае ліццё (балконы былога дома губернатара ў Віцебску, жылыя дамы ў Гродне) і інш.