ПОЛІЎКА — даўняя рэдкая страва, падкалочаная мукой. Спачатку варылі мяса з прыправамі (цыбуляй, часнаком, кропам), у посныя дні — грыбы, рыбу з алеем. Потым страву падкалочвалі мукой: невялікую яе колькасць разводзілі вадой і залівалі ў гаршчок (часам закалочвалі сухую муку), потым далівалі хлебны квас або сыроватку, бурачны расол.

На Віцебшчыне ў поліўку дадавалі хлебную рошчыну. У Глыбоцкім, Пастаўскім раёнах поліўку гатавалі і са свіной крыві. На Глушчыне поліўкай называюць булён ад мяса, рыбы. На Магілёўшчыне, Заходнім і Цэнтральным Палессі поліўка — старая назва заціркі, калатушы.