РАДАГОШЧАНАЎСКАЯ КАПЛІЦА размяшчаецца на могілках за 1 км на ўсход ад вёскі Радагошча (Чомбраў) Навагрудскага раёна Гродзенскай вобласці. Пабудавана ў 19 стагоддзі з цэглы як надмагілле ўладальніка маёнтка Чомбраў Карповіча.

Помнік архітэктуры позняга класіцызму. Вырашана ўзнятай на кубападобны пастамент чатырохграннай вежай пад сферычным купалам. Другі ярус адкрыты арачнымі прасветамі і прызначаўся для сакральнай скульптуры; апяразаны карнізам з сухарыкамі, крапаваны па вуглах трохчацвяртнымі калонамі.