РАВАНІЦКІ КАСЦЁЛ СВЯТОГА АНТОНІЯГалоўная »
РАВАНІЦКІ КАСЦЁЛ СВЯТОГА АНТОНІЯ размяшчаецца на могілках у паўночнай частцы вёскі Раванічы Чэрвеньскага раёна Мінскай вобласці. Пабудаваны ў 1790(99) годзе з цэглы па фундацыі ўладальніка раванічскага палацава-паркавага комплексу Антонія Слатвінскага як родавая пахавальня. Пасля Вялікай Айчыннай вайны выкарыстоўваўся ў гаспадарчых мэтах, у 1990-я гады пацярпеў ад пажару. У паўзруйнаваным стане.
Помнік архітэктуры класіцызму. Квадратны ў плане будынак з прамавугольнай апсідай, да якой далучаны два бакавыя нізкія сакрысціі. Фасад аформлены чатырохкалонным порцікам з трохвугольным франтонам і спрошчанымі іанічнымі капітэлямі з кветкавымі разеткамі. Уваход дэкарыраваны сандрыкам-франтончыкам і паўкруглай люкарнай, фланкіраваны арачнымі экседрамі. Бакавыя і тыльны фасады расчлянёны прамавугольнымі аконнымі праёмамі і шырокімі пілястрамі ў прасценках.
Унутры зала была перакрыта цыліндрычным скляпеннем і дэкарыравана паліхромнай размалёўкай на біблейскія тэмы. На тарцовай сцяне мелася ілюзорная выява алтара. Над уваходам хоры з парапетам у выглядзе антаблемента. Пад касцёлам крыпта.
Крыніца: Кулагін А. М. Каталіцкія храмы Беларусі: Энцыкл. даведнік / А. М. Кулагін; фатограф А. Л. Дыбоўскі. — 2-е выд. — Мн.: БелЭн, 2008. — 488 с.: іл.
|