ВЫСОКАЎСКІ КАСЦЁЛ І КЛЯШТАР БАНІФАРТАЎ размяшчаецца пры выездзе на вёску Воўчын з горада Высокае Камянецкага раёна Брэсцкай вобласці ў мясцовасці пад назвай Марыянпаль.

Пабудаваны ў 1773—85 гг. з цэглы па фундацыі канцлера BKЛ А.Сапегі. Меўся шпіталь на 20 ложкаў (пасля скасавання ў 1840 г. прыстасаваны пад сялянскі лазарэт. Ад кляштара, які ўключаў касцёл святога Іаана і шпіталь, захаваўся жылы корпус.

Жылы корпус — помнік архітэктуры барока. Вырашаны працяглым прамавугольным у плане двухпавяховым аб'ёмам пад двухсхільным дахам, завершаным па тарцах ступеньчатымі франтонамі. Франтальны фасад вылучаны па цэнтры мансардным аб'ёмам, расчлянёны лучковымі аконнымі праёмамі, крапаваны па вуглах рустам.