АДАМАВІЦКІ КАСЦЁЛ УНЕБАЎЗЯЦЦЯ НАЙСВЯЦЕЙШАЙ ДЗЕВЫ МАРЫІ размяшчаецца ва ўсходняй частцы вёскі Адамавічы Гродзенскага раёна. Пабудаваны ў 1854 г. з цэглы. Абнесены бутавай агароджай з вуглавымі капліцамі і чатырохслуповай брамай.

Помнік архітэктуры позняга класіцызму. Аб'ёмна-прасторавая кампазіцыя храма спалучае прамавугольны пад вальмавым дахам аб'ём з чацверыковай шатровай званіцай над яго франтальным фасадам. Над арачным парталам увахода скульптура святога Тэклі. Гладкія атынкаваныя і пабеленыя фасады пазбаўлены архітэктурнага дэкору, прарэзаны арачнымі аконнымі праёмамі ў простых ліштвах.

Унутраная прастора падзелена арачнымі прасветамі на малітоўную залу і апсіду з бакавымі сакрысціямі; над трохкамерным нартэксам хоры. У інтэр'еры ўзнятыя пад плоскую столь тры неабарочныя стукавыя алтары. Уздоўж сцен гарэльефныя паностацыі «Крыжовы шлях Хрыста».