БАРОЎСКАЯ КАПЛІЦАГалоўная »
БАРОЎСКАЯ КАПЛІЦА размяшчаецца за 0,5 км на поўдзень ад вёскі Баравое (Новая Рудзіца) Дзяржынскага раёна Мінскай вобласці каля шашы Дзяржынск — Рубяжэвічы. Пабудавана ў другой палавіне 19 ст. з цэглы і бутавага каменю як родавая пахавальня ўладальнікаў маёнтка Дыбоўскіх.
Помнік архітэктуры неаготыкі. Вырашана як цыліндрычны храм-ратонда, завершаны пакатым шатровым дахам. Фасад падзелены на два ярусы за кошт вылучэння першага адкрытай бутавай муроўкай, другі ярус цагляны, атынкаваны, расчлянёны стральчатымі двухграннымі ў завяршэнні аконнымі праёмамі.
Зала перакрыта плоскай бэлечнай столлю. У інтэр'еры па перыметры цокальнай часткі размешчаны два рады лучковых нішаў-склепаў для пахаванняў. Насупраць прамавугольнага ўваходнага праёма алтарная ніша.
Крыніца: Кулагін А. М. Каталіцкія храмы Беларусі: Энцыкл. даведнік / А. М. Кулагін; фатограф А. Л. Дыбоўскі. — 2-е выд. — Мн.: БелЭн, 2008. — 488 с.: іл.
|