ДАЛЁКАЎСКІ КАСЦЁЛ размяшчаецца на паўночна-ўсходняй ускраіне вёскі Далёкія Браслаўскага раёна Віцебскай вобласці. Пабудаваны ў 1930-я гг. з дрэва,у 1994 г. адрамантаваны.

Помнік архітэктуры канструктывізму. У аснове аб'ёмна-прасторавай кампазіцыі — кананічная трохнефавая аднавежавая базіліка. Яе дынамічна нарастаючая пабудова фарміруецца пераходам нізкіх бакавых нефаў пад аднасхільнымі з бакавымі вальмамі пакрыццямі да высокага цэнтральнага нефа пад двухсхільным дахам. Вертыкальнай дамінантай з'яўляецца далучаная да фасада двух’ярусная чатырохгранная званіца, завершаная пластычным купалам (рудымент стылю барока). Яруснасць кампазіцыі ўзмацняецца ніжэйшай пяціграннай апсідай пад гранёным пакрыццём. Дах над прэсбітэрыем завершаны чатырохграннай шатровай сігнатуркай. Гарызантальна ашаляваныя фасады рытмічна расчлянёны разнастайнымі па памерах прамавугольнымі аконнымі праёмамі. У інтэр'еры абраз 18 ст. «Каранаванне Маці Божай».