ГЛЫБОЦКАЯ КЕРАМІКА –
ганчарныя вырабы майстроў з г.
Глыбокае. У 1920-30-я г. працавала каля 10 майстроў, якія выраблялі разнастайную гаспадарчую і дэкаратыўную кераміку – гаршкі, макатры, бабачнікі, збанкі, гарлачы, глякі, слоікі, спарышы, міскі, паўміскі, масленіцы, цукарніцы, хлебніцы, чайнікі, кубкі, рукамыйнікі, вазоны, а таксама цацкі і інш. Посуд вызначаўся плаўнымі мяккімі абрысамі. У залежнасці ад памераў меў розныя назвы (глядзіце
Ганчарная сістэма мер).
Фармавалі ў тэхніцы выцягвання на нажным
ганчарным крузе. У фармовачную масу для пячнога посуду дамешвалі жарству. Амаль усе керамічныя рэчы пакрывалі празрыстай свінцовай палівай, якая ў залежнасці ад тэмпературы абпальвання заставалася бясколернай або прымала зеленаватае адценне.
Посуд карычнева – чырвонага колеру цаніўся больш высока. Выраблялі таксама чорназадымлены і гартаваны посуд, галоўным чынам для гатавання гарачай ежы. Традыцыйны дэкор стрыманы: лінейны
арнамент з 2 – 3 прамых палосак на верхняй частцы посуду. У 1920-я г. была пашырана кераміка з падпаліўнай размалёўкай пераважна расліннага характару, выкананая пэндзлікам або ражком па чырвоным фоне ў 2 – 3 колеры – белы, зялёны, цёмна-карычневы. У якасці фарбаў выкарыстоўвалі белы
ангоб, парашок перапаленай медзі (зялёнка), вокіс марганцу (бруштын).
З 1970-х г. промысел не існуе.