ГРАДАЎШЧЫНСКІ КАСЦЁЛ СВЯТОГА АНДРЭЯ БАБОЛІ размяшчаецца ў цэнтры вёскі Градаўшчына Астравецкага раёна Гродзенскай вобласці. Пабудаваны ў 1938—39 гг. з дрэва, адрамантаваны ў 1980-я гг., асвячоны 16.05.1994 г.

Помнік архітэктуры стылю мадэрн. Прамавугольны зруб нефа пераходзіць у пяцігранную апсіду, перакрыты высокім двухсхільным дахам і ўмацаваны брусамі-сцяжкамі ў прасценках высокіх прамавугольных аконных праёмаў. Над вальмавым пакрыццём апсіды ўзвышаецца сігнатурка. Галоўны фасад завершаны двухгранным шчыпцом з двух'яруснай чацверыковай шатровай вежай, крапаваны бакавымі рызалітамі. Шчыпец мае лучковую нішу з драўлянай скульптурай Мадонны. Да галоўнага фасада прыбудаваны прытвор з арачным уваходам. Уздоўж бакавых падоўжных фасадаў праходзяць адкрытыя слуповыя галерэі-гульбішчы. Прасторная зала перакрыта плоскай столлю, пры ўваходзе — галерэя хораў. Сцены аформлены фігурнай шалёўкай. У апсідзе разны алтар у выглядзе трыумфальнай аркі.