ГРОДЗЕНСКАЯ КАПЛІЦА размяшчаецца ў
горадзе
Гродна нa вуліцы Белуша, на вайсковых могілках. Узведзена ў 1896 г. як пахавальня генерал-маёра рускай арміі, маршалка Гродзенскага павета, шаноўнага міравога суддзі Гродзенскай акругі А.А.Русау (1834—96 гг.).
Помнік архітэктуры рэтраспектыўна-гатычнага стылю. Цэнтрычная, квадратная ў плане цагляная пабудова накрыта чатырохгранным чарапічным шатром са слыхавымі вокнамі. Грані прарэзаны стральчатымі вокнамі і завершаны двухграннымі шчыпцамі з крэмальернымі фрызамі, круглымі разеткамі з гатычным спляценнем крат, крыжамі на пастаментах. Вуглы цэнтрычнага аб'ёму ўмацаваны двухступеньчатымі контрфорсамі-пілонамі, завершанымі чатырохграннымі шатровымі фіяламі. Стральчаты ўваходны партал з каванымі дзвярамі, як і аконныя
ліштвы, мае перспектыўны выгляд. Архітэктурныя абломы (выкружкі,
карнізы, цягі,
нішы) эфектна выкананы сродкамі высакаякаснай мастацкай цаглянай муроўкі. Унутры на
алтарнай сцяне ўмуравана чыгунная мемарыяльная пліта. Камора капліцы перакрыта сферычным скляпеннем, сцены крапаваны аркамі.