ГРУШАЎСКАЯ КАПЛІЦА БОЖАЙ МІЛАСЭРНАСЦІ размяшчаецца за 0,5 км на захад ад вёскі Грушаўка, (урочышча Дубы) Ляхавіцкага раёна Брэсцкай вобласці. Пабудавана ў пачатку 20 ст. з цэглы Г.Грабоўскім ў баку ад яго сядзіб, на каталіцкіх могілках, якія акружае мураваная агароджа з гатычнай брамай.

У 1939 г. перад капліцай быў пастаўлены помнік Т.Рэйтану (знік у 1945 г.) — «пану з Чорнай Русі», паслу навагрудскай зямлі на варшаўскі сейм, які выступаў супраць падзелу Рэчы Паспалітай.

Помнік архітэктуры неаготыкі. Прамавугольны ў плане аб'ём з трохграннай апсідай і высокім двухгранным шчытом на галоўным фасадзе, двумя стральчатымі аконнымі праёмамі на бакавых фасадах, аформленымі падаконнай аркатурай. Галоўны ўваход вырашаны перспектыўным уваходным парталам з зубчастым атыкам. Вуглы будынка ўмацаваны контрфорсамі з гатычнымі крабавымі фіяламі ў завяршэнні. Унутры — ажурнае нервюрнае скляпенне. Пры ўваходзе ў капліцу размешчана лесвіца ў склеп.