КАНВЕЛІШКАЎСКІ КАСЦЁЛ НАЙСВЯЦЕЙШАГА СЭРЦА ІСУСА размяшчаецца ў цэнтры вёскі Канвелішкі Воранаўскага раёна Гродзенскай вобласці. Пабудаваны ў 1916—25 гг. з дрэва на месцы касцёла 1808 г.

Помнік архітэктуры неаготыкі. Складаецца з аднолькавых па вышыні чатырохсценнага зруба і выцягнутай пяціграннай апсіды з бакавымі сакрысціямі. Над фасадам узвышаецца стромкая двух'ярусная чацверыковая вежа-званіца са шпілем, якую фланкіруюць падобныя, але меншыя сігнатуркі; паміж імі трохвугольны франтон. Тры ўваходы аформлены арачнымі парталамі з вокнамі-ружамі над імі. Астатнія праёмы з паўцыркульнымі архівольтамі. Інтэр'ер падзелены шасцю слупамі на тры нефы, бакавыя з якіх апяразаны абходнымі галерэямі пад плоскай столлю.