ЛАГОЙСКІ КАСЦЁЛ СВЯТОГА КАЗІМІРА размяшчаецца на левым беразе р. Гайна ў горадзе Лагойск Мінскай вобласці. Пабудаваны ў 1999 г. з цэглы паводле праекта мінскага архітэктара М.Калечыца на месцы мураванага касцёла 1793 г. (знішчаны ў 1950-я гг.).

Архітэктурная стылістыка храма навеяна сярэдневяковай готыкай. Вырашаны прамавугольным у плане будынкам, накрытым стромкім двухсхільным дахам і фланкіраваным крыламі трансепта. Да фасада асіметрычна далучана чатырохгранная вежа-званіца. Плоскасныя фасады расчлянёны ў два ярусы арачнымі двухграннымі і прамавугольнымі аконнымі праёмамі і лапаткамі ў прасценках. Над прамавугольным уваходным парталам і алтарнай сцяне крыжовыя аконныя праёмы. Зала перакрыта корабавым скляпеннем.