МАЛЮНАК — выява, зробленая ад рукі з дапамогай графічных сродкаў, спалучэннямі якіх дасягаюцца пластычная мадэліроўка, танальныя і святлаценевыя эфекты. Адна з найважнейшых і шырока развітых галінаў выяўленчага мастацтва, складае аснову ўсіх відаў мастацкага адлюстравання на плоскасці (
графіка,
жывапіс, рэльеф). Як самастойную галіну мастацкай творчасці малюнак адносяць да графікі (станковы малюнак, эскіз, накід, замалёўка, эцюд). Адзін са сродкаў графікі архітэктурнай; на яго аснове развіваюцца
гравюра і літаграфія. Адрозніваюць малюнак паводле метаду, тэхнікі і характару малявання, тэмаў і жанраў, прызначэння. Па тэхналогіі выканання бываюць малюнкі сухімі і вадкімі фарбавальнымі рэчывамі. Сухія — вугаль, італьянскі аловак, штыфт (свінцовы, срэбны), сангіна, графіт; вадкія — туш, бістр, сепія, чарніла (наносяцца пяром або пэндзлем). У якасці асновы выкарыстоўваюць паперу (у старажытнасці папірус, пергамент). Акварэль, гуаш, пастэль, соўс, туш могуць служыць сродкам для стварэння ўласна малюнка, a таксама і для жывапісных твораў. Складае аснову мастацкай адукацыі (маляванне з натуры, навучальнае маляванне).
Гэта адзін з найбольш старажытных відаў мастацтва: з эпохі позняга палеаліту вядомыя наскальныя малюнкі, зробленыя вугалем, сажай, мінеральнымі фарбамі. У першабытным мастацтве Беларусі неаддзельны ад
арнаментыкі на касцяных, каменных, металічных, гліняных вырабах. У мастацтве сярэднявечча спецыфіка найбольш яскрава выявілася ў аздобах рукапісаў, у ілюстраванні беларускай друкаванай кнігі, a таксама ў «прорысях»
абразоў і фрэсак. Зберагліся падрыхтоўчыя малюнкі Б.Радзівіла да архітэктурных планаў, А. ван Вестэрфельда да шпалераў (XVII — XVIII). У развіцці мастацтва малюнка ў Беларусі да пачатку XX ст. значную ролю адыграла
Віленская мастацкая школа, а таксама калегіум езуітаў у Полацку, дзе навучалі малюнку.
Шмат працавалі ў гэтай галіне Я.Дамель, I.Аляшкевіч, Г.Вейсенгоф, B.Ваньковіч, Н.Сілівановіч, С. Богуш-Сестранцэвіч, Ф.Рушчыц (XIX — пачатак XX стст.). У 1920 — 1930-я гг. Ў галіне станковага малюнка працавалі Я.Драздовіч, А.Астаповіч, М.Аксельрод, М.Філіповіч, П.Сергіевіч, М.Тарасікаў, А.Тычына і інш. У 1940 — 1980-х гг. сярод майстроў В. і А.Волкавы, С.Раманаў, А. Паслядовіч, М.Гуціеў, А.Кашкурэвіч, В.Шаранговіч, C.Герус, У.Сакалоў, I.Ушакоў, П.Любамудраў, Г.Паплаўскі, Я.Жылін, М.Блішч, М.Карпук, Я.Кулік, У.Басалыга, У.Савіч, У.Гардзеенка, М.Рагалевіч, М.Селяшчук, А.Пашкевіч, В.Дубрава, С.Гарачаў, В.Мікіта і інш.
У Беларусі малюнак выкладаюць у
Беларускай акадэміі мастацтваў, Віцебскім дзяржаўным універсітэце, Мінскім дзяржаўным мастацкім каледжы і інш.