НАВАГРУДСКАЯ РАТУША існавала ў 17 — 19 ст. у г. Навагрудак Гродзенскай вобласці. Упершыню ўпамінаецца ў сеймавай канстытуцыі 1652 г.


Мяркуюць, што ў 1664 г. пад ратушу прыстасаваны будынак камяніцы на рынку. У час пажару 1751 г. ён пашкоджаны, пазней адноўлены: на рагу будынка прыбудавана 2-ярусная вежа, завершаная купалам і флюгерам з выявай архангела Міхаіла (лічыўся абаронцам горада).

У 1818 г. навагрудская ратуша значна рэканструявана: зменены агульная планіроўка, аконныя і дзвярныя праёмы, на ўзроўні 2-га паверха галоўнага фасада, арыентаванага на плошчу, зроблена галерэя (апіралася на 4 калоны). Ратуша набыла рысы класіцызму: рустоўка па вуглах будынка і на гранях вежы 1-га паверха, нішы на 2-м паверсе. У такім выглядзе яна існавала да пажару 1862 г., калі была моцна пашкоджана і больш не аднаўлялася.

Каля 1900 г. на месцы навагрудскай ратушы ўзведзены новы будынак гарадскога магістрата (верагодна, былі выкарыстаны фундаменты і часткі сцен старой ратушы), у Вялікую Айчынную вайну разбураны.