НЯСВІЖСКАЯ СЛУЦКАЯ БРАМА — помнік архітэктуры барока ў г. Нясвіж Мінскай вобласці. Пабудавана ў 1690 г. на месцы брамы 16 ст., перабудавана ці адноўлена ў 1700 г. (паводле іншых звестак у 1760 г.) на дарозе-дамбе ўздоўж возера, якая вяла ў горад з боку Слуцкага тракту.

Мураваны 2-ярусны прамавугольны ў плане аб'ём з вялікім арачным праездам унутры (даўжыня 10,3 м), сцены ўмацаваны контрфорсамі, накрыты 2-схільным чарапічным дахам. Падоўжаныя фасады завершаны пластычнымі франтонамі з крывалінейным абрысам. На першым ярусе знаходзіліся памяшканні для варты, на 2-м — капліца, раскрытая праз вялікі праём з балконам у бок горада. У 1970-я г. брама рэстаўрыравана.