НЯСВІЖСКІ ЕЗУІЦКІ КАЛЕГІУМ дзейнічаў у 1586 — 1773 гг. у Нясвіжы як сярэдняя навучальная ўстанова. Заснаваны М.К.Радзівілам Сіроткам, які падараваў калегіуму маёнтак Ліпск з 6 вёскамі.

У 1584-93 гг. пабудаваны корпус Нясвіжскі езуіцкі калегіум і пры ім Нясвіжскі касцёл езуітаў. Нясвіжскія езуіты стварылі свае місіі ў Капылі, Крывошыне, Ліпску, Мікалаеве і інш. У 1586 г. у Нясвіжскім езуіцкім калегіуме адкрыты класы граматыкі, потым — паэтыкі, рыторыкі і інш.

Пры калегіуме дзейнічалі: з 1610 г. музычная бурса, з 1620 г. канвікт (інтэрнат) для дзяцей збяднелай шляхты, з 1627 г. аптэка, з 1750 г. Нясвіжская друкарня Радзівілаў. У пачатку 17 ст. ў калегіуме было каля 300 вучняў. Яго бібліятэка ў 1773 г. налічвала каля 15 тыс. тамоў. Са скасаваннем ордэна езуітаў (1773) калегіум пераўтвораны ў свецкую школу, касцёл — у парафіяльны. Іншыя будынкі не захаваліся.