ЗАНЯВІЧСКІ КАСЦЁЛ НАЙСВЯЦЕЙШАГА СЭРЦА ІСУСА І СВЯТОГА ЮЗАФА размяшчаецца на могілках за 1 км на ўсход ад вёскі Літвінкі (Занявічы) Гродзенскага раёна. Пабудаваны ў 1917 г. з цэглы паводле праекта, распрацаванага ў 1908 г. Рэстаўрыраваны ў 1989 г.

Помнік архітэктуры неакласіцызму. Квадратны ў плане аб'ём пад двухсхільным дахам на галоўным фасадзе аформлены магутным чатырохкалонным порцікам утрыраванага тасканскага ордэра з высокім і масіўным антаблементам і трохвугольным франтонам над ім. Бакавыя фасады і алтарная сцяна рытмічна расчлянёны высокімі арачнымі аконнымі праёмамі і блендамі, дэкарыраванымі ліштвамі, ніжнімі панэлямі, апяразаны цягамі і прафіляваным карнізам. У дэкоры выкарыстаны вуглавая рустоўка, простага профілю карніз і цягі. У апсідзе, перакрытай плоскай столлю залы, адасоблена сакрысція.