ЗЯМКЕВІЧ Рамуальд Аляксандравіч (07.02.1881 г., Варшава – 1943 або 1944 гг.; псеўданімы Раман Суніца, Юры Алелькавіч) – гісторык літаратуры, бібліяфіл, бібліёграф, публіцыст і перакладчык. Жыў пераважна ў Варшаве, часта наведваў Беларусь, з 1905 г. супрацоўнічаў з М.Федароўскім (дапамагаў матэрыяламі і запісамі, у 1931 – 1935 гг. вёў карэктуру т. 4 працы «Люд беларускі».
Сабраў вялікую калекцыю беларускага народнага адзення, часта вышыванага і арнаментаванага (вывезеная немцамі ў 1918 г. у Берлін), а таксама рукапісаў беларускіх пісьменнікаў. У 1908 г. запісваў фальклорна-этнаграфічныя матэрыялы ў ваколіцах Зембіна сучаснага
Барысаўскага р-на. У 1913 – 1914 гг. шукаў гісторыка-літаратурныя матэрыялы на
Магілёўшчыне, дзе таксама запісваў і беларускі фальклор. У многіх ягоных працах, што выйшлі асобнымі кніжкамі, было шмат на той час невядомых фактаў і звестак.
Ліставаўся з А.Шлюбскім,
Яўхімам Карскім,
Аляксандрам Ельскім ды іншымі. Надрукаваў невядомыя рукапісы
Максіма Багдановіча, К.Каганца, В.Дуніна-Марцінкевіча, Я.Лучыны. У гады Другой сусветнай вайны пры невядомых абставінах трапіў у рукі гестапа і загінуў (паводле некаторых звестак — у канцлагеры). Багаты архіў Р.Зямкевіча не захаваўся, частка
бібліятэкі перайшла іншым людзям. Асобныя лісты і рукапісы зберагаюцца ў архівах і бібліятэках Варшавы, Мінска, Вільні, Санкт-Пецярбурга ды інш.