КОБРЫНСКІ КАСЦЁЛ УНЕБАЎЗЯЦЦЯ НАЙСВЯЦЕЙШАЙ ДЗЕВЫ МАРЫІ размяшчаецца на вуліцы Першамайскай ва ўсходняй частцы
горада
Кобрын Брэсцкай вобласці. Пабудаваны ў 1841—45 гг. з цэглы на сродкі парафіян паводле праекта 1839 г. гродзенскага губернскага архітэктара Міхаэліса. Закрыты ў 1962 г., перададзены вернікам у 1989 г. і адрэстаўрыраваны польскімі спецыялістамі.
Помнік архітэктуры класіцызму. Трохнефавы двухвежавы храм. Прамавугольны ў плане аб'ём накрыты двухсхільным дахам. Галоўны фасад фланкіраваны дзвума аднаяруснымі чацверыковымі шатровымі
вежамі. Уваход вырашаны вялікім арачным парталам, фланкіраваным лучковымі экседрамі са скульптурамі святых. Бакавыя фасады рытмічна расчлянёны арачнымі аконнымі праёмамі і пілястрамі ў прасценках, аб'яднанымі аркатурай. Унутры прастора храма размежавана на
нефы высокімі аркадамі на чатырохгранных пілонах, перакрыта плоскім плафонам.
Алтар вырашаны чатырохпілястравым порцікам з паўкруглым франтонам з
вітражнай люкарнай па цэнтры.