КУПАЛАЎСКІ МЕМАРЫЯЛЬНЫ ЗАПАВЕДНІК «ВЯЗЫНКА» заснаваны паводле пастановы Савета Міністраў
БССР ад 05.04.1972 г. на радзіме народнага паэта Беларусі Я.Купалы з цэнтрам у в.Вязынка Маладзечанскага раёна. Назву атрымаў ад былой сядзібы Вязынка, дзе сям'я Я.Купалы арандавала зямлю ў пана С.Замбржыцкага ў 1881—83 гг. Адкрыты для наведвальнікаў 10.07.1972 г. да 90-годдзя з дня нараджэння паэта. Агульная плошча запаведніка 21 га. Аўтары праекта — архітэктары С.Мусінскі і А.Канаваленка.
У запаведніку захаваны натуральны ландшафт былой сядзібы, яе планіроўка, найбольш старыя дрэвы. З дапамогай навуковых архіўных апісанняў, успамінаў сучаснікаў, фотаздымкаў, чарцяжоў і планаў адноўлена хата, дзе нарадзіўся паэт, тагачасны свіран, захаваны хатка дваровых, сажалка, крыніца, частка фруктовага саду, ліпавая алея, якая вяла да сядзібнага дома Замбржыцкіх. На тэрыторыі запаведніка знаходзяцца мемарыяльныя валуны з высечанымі на іх радкамі з твораў паэта, дуброва, пасаджаная беларускімі пісьменнікамі да 100-годдзя з дня нараджэння песняра, жывая
альтанка з ліп, канцэртная эстрада, зона для правядзення паэтычных свят, выставак народных майстроў і масавых гулянняў На левым беразе р.Вязынка захаваўся
курган-
гарадзішча ІІ — V ст. (мясцовая назва «Замэчак»). У цэнтры запаведніка стаіць бронзавы бюст Я.Купалы (1972 г., скульптар З.Азгур). У хаце знаходзіцца філіял
Літаратурнага музея Я.Купалы «Вязынка». З 1972 г. штогод на тэрыторыі запаведніка ў дзень нараджэння паэта (7 ліпеня) праводзяцца святы паэзіі, песні і народных рамёстваў, з 1976 г. — традыцыйныя злёты студэнтаў-філолагаў
БДУ. Уключаны ў рэспубліканскія турысцкія маршруты.
Адрас: 222322, в.Вязынка, Маладзечанскі раён
Тэл.: +375-17-503-03-40