ЛАГІШЫНСКІ КАСЦЁЛ СВЯТЫХ АПОСТАЛАЎ ПЯТРА І ПАЎЛА размяшчаецца ў цэнтры гарадскога пасёлка Лагішын Пінскага раёна Брэсцкай вобласці. Пабудаваны ў 1907—10 гг. з цэглы намаганнямі пінскага ксяндза С. Войткі і абывацеля Э.Корсака, асвячоны магілёўскім архібіскупам Клучынскім у 1913 г.

Першы мураваны храм быў пабудаваны ў 1634 г. па фундацыі князя Ст.А.Радзівіла. У храме знаходзілася цудатворная ікона Маці Божай, шанаваная настолькі, што нават сеймы Рэчы Паспалітай апекавалі яе і для «памнажэння хвалы Богу» неаднаразова выдавалі прывілеі касцёлу. Напрыклад, у 1667 г. быў адменены налог на касцёльную ўласнасць. У 1678—1773 гг. дзейнічала езуіцкая місія. У 1863 г. налічвалася 3256 парафіян. У 1865 г. храм забраны пад праваслаўную царкву, а парафіяне прыпісаны да Пінска.

Помнік архітэктуры неаготыкі. Да прамавугольнага асноўнага аб'ёму пад двухсхільным дахам па па-доўжнай восі далучаны пяцігранная апсіда і чатырох’ярусная шатровая званіца. Сцены расчлянёны стральчатымі вокнамі-біфорыумамі і двухступеньчатымі контрфорсамі ў прасценках. Асіметрыю ў агульную кампазіцыю ўносяць прыбудовы да апсіды сакрысціі і гранёнай вежы да званіцы. Уваход вырашаны перспектыўным стральчатым парталам і вылучаны востраканцовым вімпергам, над якім акно-біфорыум, што асвятляе арганную галерэю. Тарцы двухсхільнага даху закрыты зубчастымі шчыпцамі.

Дэкаратыўна-мастацкім акцэнтам інтэр'ера з'яўляецца драўляны алтар, антаблемент якога фланкіруюць выявы ўкленчаных пазалочаных анёлаў. У алтары знаходзіцца абраз Маці Божай Лагішынскай (Каралевы Палесся). Намаганнямі архібіскупа кардынала Казіміра Свёнтака абраз быў адноўлены, 01.01.1997 г. зноў урачыста перададзены касцёлу і каранаваны 10 мая.