МАЛАДЗЕЧАНСКІ КАСЦЁЛ СВЯТОГА ЮЗАФА размяшчаецца ў цэнтры горада Маладзечна Мінскай вобласці на вуліцы Прытыцкага. Пабудаваны ў 1993—97 гады з цэглы на месцы вайсковых могілак каля старога касцёла святога Юзафа, зруйнаваны пасля 1956 года.

Твор архітэктуры канструктывісцкага характару. Вырашаны па канону трохнефавай базілікі. Галоўны фасад фланкіраваны высокімі чатырохграннымі зубчастымі вежамі, якія завершаны двух’яруснымі каркаснымі металічнымі званіцамі. Цэнтральная частка фасада з двухгранным завяршэннем, па восі сіметрыі прарэзана вялікім прамавугольным аконным праёмам, над якім размешчаны абраз «Маці Божая Вастрабрамская» (мясцовы майстр). Архітэктурны рытм засноўваецца на чаргаванні прамавугольных аконных праёмаў і вертыкальных пілонаў.

У інтэр'еры ў алтары драўляная скульптура «Укрыжаванне», на бакавых сценах — пано-стацыі «Крыжовы шлях Хрыста» (мясцовыя майстры), у сакрысціі — разная скульптура Ісуса Хрыста (мастак Я.Кадушкевіч).