МІНСКІ МУЗЕЙ СУЧАСНАГА ВЫЯЎЛЕНЧАГА МАСТАЦТВА заснаваны 13.06.1997 г. у г.Мінск пастановай Савета Міністраў Рэспублікі Беларусь. Адкрыты для наведвальнікаў 18.05.1998 г.

Фонд музея (2008) налічвае 2162 адзінкі захоўвання. Агульная плошча выставачных залаў 260 м².

З 1998 г. музей правёў каля 400 выставак (у т.л. больш за 80 з фондаў музея і прыватных калекцый мастакоў) у сваіх залах, а таксама ў іншых гарадах Беларусі — Гомелі, Віцебску, Гродне, Бабруйску, Баранавічах, Шклове, Светлагорску, Нясвіжы, Пінску і інш. і за яе межамі У залах музея дэманстраваліся таксама творы мастакоў з краін блізкага і далёкага замежжа: Расіі, Украіны, Літвы, Эстоніі, Аўстрыі, Германіі, Грэцыі, Італіі, Кітая, Мексікі, Польшчы, Фінляндыі, Францыі, Швецыі, Югаславіі і іншых дзяржаў. Іх работы дазволілі пазнаёміць беларускіх гледачоў з разнастайнасцю мастацкага жыцця гэтых краін. За час свайго існавання музей удзельнічаў у больш чым 35 праектах за межамі краіны: у Днях культуры Рэспублікі Беларусь у Расіі, Украіне, у выстаўках графікі ў Італіі, жывапісу, графікі і скульптуры ў Палацы Нацый у Жэневе, у цэнтры П’ера Кардэна ў Парыжы і інш. У межах папулярызацыі беларускага мастацтва музей праводзіць выстаўкі пад рубрыкамі «Новыя імёны», «Прадстаўляем рэгіён», «Новая калекцыя», дзе прапагандуе мастацтва маладых аўтараў, творчасць мастакоў Брэста, Гомеля, Віцебска, Полацка, Пінска і інш., дэманструе свае калекцыі жывапісу, графікі, скульптуры і іншых жанраў ва ўласных залах і на перасоўных выстаўках. Практыкуюцца разнастайныя напрамкі выставачнай дзейнасці: год скульптурных праектаў (2005), у межах якога адбыліся «Скульптурны пленэр» і выстаўка-прагляд скульптурных праектаў для горада; год графікі (2006), які ўключаў лепшы замежны праект — выстаўку графікі «Праз традыцыі ў будучыню», праведзеную пры дапамозе каралеўскай сям’і Швецыі і з яе калекцыі, і г.д. Адбыліся таксама выстаўка работ студэнтаў і выпускнікоў факультэта дызайну Беларускай акадэміі мастацтваў, прысвечаная 30-годдзю факультэта; акцыя «Мы побач з вамі», якая прадставіла работы дзяцей, што знаходзяцца на лячэнні і рэабілітацыі ў НДІ анкалогіі і цыталогіі; выстаўка твораў навучэнцаў Мінскай гімназіі-каледжа мастацтваў «Мінск учора, сёння, заўтра». Больш за 70% твораў з калекцыі музея — падарункі аўтараў, у шэрагу выпадкаў атрыманыя ў дар цалкам выставачныя экспазіцыі. Штогод арганізуюцца выстаўкі «Мастакі музею».

Пашыраюцца міжнародныя сувязі. У 2007 г. дэманстраваліся 8 выставак з Італіі, Аўстрыі, Літвы, Украіны, Швецыі, Германіі; у Польшчы — выстаўка твораў В.П. Шаранговіча, прысвечаная 125-годдзю Якуба Коласа і Я.Купалы. У тым жа годзе адбылася прэзентацыя альбома твораў са збораў музея ў сувязі з яго 10-гадовым юбілеем.