МСЦІСЛАВЕЦ Пётр Цімафеевіч (пачатак XVI ст., Мсціслаў — пасля 1577 / пачатак XVII ст.) — адзін з беларускіх і рускіх першадрукароў, гравёр XVI ст. Выхадзец з Мсціслава. Удзельнічаў у заснаванні Iванам Фёдаравым друкарні ў Маскве, дзе надрукаваныя першая датаваная руская друкаваная кніга «Апостал» (1564 r.), a таксама два выданні «Часоўніка» (1565 г.).

З-за ганенняў рэакцыйных колаў і кансерватыўнага духавенства з Фёдаравым пакінуў Маскву і пеpaеxaў у мястэчка Заблудава Гродзенскага павета да гетмана Вялікага Княства Літоўскага Р.Хадкевіча. Той дапамог заснаваць Заблудаўскую друкарню (дзе карысталіся вывезенымі з Масквы шрыфтам, дошкамі, застаўкамі і літарамі) і выдаць «Евангелле вучыцельскае» (1569 г.) і «Псалтыр з Часаслоўцам» (1570 г.). У 1569 г. П.Мсціславец пераехаў у Вільню, дзе на грошы і ў доме віленскіх купцоў братоў Кузьмы і Лукі Мамонічаў заснаваў друкарню і выдаў «Часоўнік» [1574 — 1576(?)], «Евангелле напрастольнае» (1575 г.), «Псалтыр» (1576 г.). У «Часоўніку» ён упершыню выкарыстаў шрыфт, падобны да буйнога паўуставу, які ў далейшым капіраваўся пры кожным перавыданні кнігі.

Выданні Мсціслаўца адметныя высокім паліграфічным узроўнем, мелі маляўнічы арнамент, гравюры, аказалі значны ўплыў на кнігадрукаванне ў Вялікім Княстве Літоўскім. Матэрыялы яго друкарні выкарыстоўваліся ў Астрожскай, Дзерманскай і іншых украінскіх друкарнях XVI — пачатку XVII ст.

У 2001 г. у г.Мсціславе ўсталяваны помнік друкару асветніку Пятру Мсціслаўцу.