ПРАСЦІНАЎСКАЯ КАПЛІЦА размяшчаецца на могілках у цэнтры вёскі Прасці (Просці) Нясвіжскага раёна Мінскай вобласці. Пабудавана ў другой палавіне 19 стагоддзя з цэглы як пахавальня ўладальнікаў маёнтка Пратасевічаў (мемарыяльная дошка Францішкі Пратасевіч з Пуслоўскіх, 1803—08.05.1891 гады). Адноўлена да 2016 года.

Помнік архітэктуры неакласіцызму. Вырашаны прамавугольным у плане аб'ёмам пад двухсхільным дахам з ніжэйшай апсідай. Фасад завершаны двухгранным шчытом на бакавых лапатках; па цэнтры адзначаны ўваходным класіцыстычным парталам (накладны пілястравы порцік з трохвугольным франтонам) і арачным аконным праёмам хораў над ім. Пілястравымі накладнымі порцікамі адзначаны два бакавыя прамавугольныя аконныя праёмы.