РАСНАЎСКІ КАСЦЁЛ СВЯТОГА КАЗІМІРАГалоўная »
РАСНАЎСКІ КАСЦЁЛ СВЯТОГА КАЗІМІРА размяшчаецца ў цэнтры вёскі Расна Дрыбінскага раёна Магілёўскай вобласці. Пабудаваны ў 1819 годзе з цэглы на сродкі навакольнай шляхты. Першапачатковы драўляны касцёл быў фундаваны Пацамі ў 1751 годзе і перададзены ксяндзам-езуітам. Згарэў у 1804 годзе.
Помнік архітэктуры класіцызму. Трох нефавая прамавугольная ў плане базіліка з прамавугольнай апсідай і двумя квадратнымі сакрысціямі. Галоўны фасад вылучаны чатырохкалонным дарычным порцікам з трохвугольным франтонам на развітым антаблеменце з трыгліфным фрызам, які апяразвае будынак па перыметры. Порцік фланкіраваны арачнымі экседрамі, аформленымі класіцыстычнымі парталамі. Аналагічнымі порцікамі вылучаны цэнтральныя рызаліты бакавых фасадаў. Прамавугольныя аконныя праёмы аздоблены сандрыкамі. Унутраная прастора падзелена двумя радамі калон дарычнага ордэра на тры нефы.
У вугле агароджы, справа перад касцёлам, стаяла двух’ярусная шатровая драўляная званіца каркаснай канструкцыі (не захавалася).
Крыніца: Кулагін А. М. Каталіцкія храмы Беларусі: Энцыкл. даведнік / А. М. Кулагін; фатограф А. Л. Дыбоўскі. — 2-е выд. — Мн.: БелЭн, 2008. — 488 с.: іл.
|