ВЯЛІКАЭЙСМАНТАЎСКІ КАСЦЁЛ НАЙСВЯЦЕЙШАЙ ДЗЕВЫ МАРЫІ размяшчаецца ў цэнтры вёскі Вялікія Эйсманты Бераставіцкага раёна Гродзенскай вобласці. Пабудаваны ў 1849—50 гг. з бутавага каменю пад кіраўніцтвам ксяндза Міхаіла Сезяноўскага. У 1912 г. адрэстаўрыраваны.

Паводле старажытных хронік першапачатковы касцёл пабудаваны ў 1659 г. на сродкі Ганны Эйсмантавай і яе сына Якава, згарэў у 1722 г. Існуючы храм пасля паўстання 1863—64 гг. быў закрыты. У 1903—10 гг. рабіліся спробы ўзвесці новы будынак, у выкладзеных з бутавага каменю сценах з'явіліся трэшчыны, якія пастаянна павялічваліся. Было складзена некалькі праектаў касцёла, але парафіяне на ўласныя сродкі перабудавалі яго сціплым.

Архітэктурная стылістыка прамавугольнага ў плане храма з кубападобнай апсідай і сакрысціямі вызначаецца эклектычным спалучэннем класіцыстычных і гатычных рэмінісцэнцый — чатырохкалонны дарычны порцік галоўнага фасада суседнічае з гатычнымі стральчатымі аконнымі праёмамі бакавых плоскасных фасадаў. Па баках уваходнага партала арачныя нішы. Магутны трохвугольны франтон двухсхільнага даху запоўнены прамянямі кампазіцыі «Усёбачнае Вока».

Унутраная прастора чатырмя парамі драўляных слупоў падзелена на тры нефы: цэнтральны перакрыты цыліндрычным скляпеннем з размалёўкай, бакавыя — плоскай столлю. Галоўны драўляны алтар з абразом «Маці Божая Эйсмантаўская» (першая палавіна 18 ст., прыўнесены ў 1740 г.) вырашаны ў стылі рэтраспектыўнай готыкі, бакавыя — з элементамі класіцызму і барока. Над уваходам на шырыню залы на дзвух слупах узняты аркатурныя хоры з арганам. Абразы мяжы 18—19 ст. «Маці Божая Вастрабрамская», «Маці Божая Ляжайская», «Маці Божая Чанстахоўская» (пачатак 19 ст.), абраз у металічнай шаце 18 ст. «Ян Непамук». Шэраг абразоў напісаў беларускі мастак Каспар Бароўскі (1785—1854).