ВОЙСТАМАЎСКІ КАСЦЁЛ НАЙСВЯЦЕЙШАЙ ТРОЙЦЫ размяшчаецца ў паўднёвай частцы вёскі Войстам Смаргонскага раёна Гродзенскай вобласці.

Пабудаваны ў 1939 г. з цэглы, бутавага каменю і бетону. Звесткі пра першы касцёл адносяцца да 1440 г., у 16 ст. ён стаў кальвінскім зборам. Адноўлены як касцёл пры заснаванні тут у 17 ст. езуіцкай місіі. Асвячоны 08.09.1939 г.

Помнік архітэктуры стылю мадэрн (неараманскі накірунак). Вырашаны прамавугольным аб'ёмам, узнятым на высокі бутавы цокаль і накрытым двухсхільным дахам з паўвальмай над фасадам і чатырохграннай сігнатуркай над алтарнай часткай. Да алтарнай сцяны далучана пяцігранная апсіда з нізкімі бакавымі сакрысціямі. Уваходны праём на глухім франтальным фасадзе фланкіраваны пяціграннымі вежамі-эркерамі, рызалітамі са ступеньчатымі атыкамі. Бакавыя фасады рытмічна расчлянёны арачнымі аконнымі праёмамі і лапаткамі ў прасценках, крапаваны ў алтарнай частцы рызалітамі трансепта, завершанымі прамавугольнымі ступеньчатымі атыкамі.

Шырокая зала (18 м) перакрыта цыліндрычным скляпеннем са складанай канструкцыяй падпружных арак і люнетаў, абапёртых на магутныя прысценныя пілоны. Апсіда, крылы трансепта і неф адкрываюцца ў планіровачнае сяродкрыжжа шырокімі арачнымі прасветамі. Прасценак нартэкса прарэзаны шырокай аркай размешчаных над ім антрэсолей хораў.