ВЫСОКАЎСКІ КАСЦЁЛ НАЙСВЯЦЕЙШАЙ ТРОЙЦЫГалоўная »
ВЫСОКАЎСКІ КАСЦЁЛ НАЙСВЯЦЕЙШАЙ ТРОЙЦЫ размяшчаецца ў горадзе Высокае Камянецкага раёна Брэсцкай вобласці.
Быў фундаваны вялікім князем літоўскім Вітаўтам у 15 ст., вымураваны як парафіяльны ў 1603—08 гг. падчашым А.Войнам. Быў адноўлены ў 1872 г. М.Патоцкай. Вядомы па малюнку Н.Орды 1876 г. У падпарадкаванні касцёла знаходзілася капліца святой Барбары, пабудаваная на месцы першапачатковага касцёла (захавалася). У 1935 г. абслугоўваў каля 2200 парафіян. Рэстаўрыраваны ў пачатку 21 ст.
Твор архітэктуры барока. Быў вырашаны двухвежавай базілікай з трансептам і сігнатуркай над яго перакрыжаваннем з караблём храма. Высунутыя наперад чатырох'ярусныя шатровыя вежы фланкіравалі плоскасць фасада, завершаную двухгранным атыкам і крапаваную пілястрамі; у цэнтры прамавугольны ўваходны праём, над якім быў размешчаны рэльефны лацінскі крыж. Пілястравай крапоўкай вылучаліся вуглы ярусаў- вежаў.
Крыніца: Кулагін А. М. Каталіцкія храмы Беларусі: Энцыкл. даведнік / А. М. Кулагін; фатограф А. Л. Дыбоўскі. — 2-е выд. — Мн.: БелЭн, 2008. — 488 с.: іл.
|