ЖЫРМУНОЎСКІ КАСЦЁЛ АДШУКАННЯ СВЯТОГА КРЫЖА размяшчаецца ў цэнтры вёскі Жырмуны Воранаўскага раёна Гродзенскай вобласці. Пабудаваны ў 1788—89 гг. з дрэва Каралінай Радзівіл паводле праекта Я.Падчашынскага на месцы храма 1664 г., пабудаванага ўладальнікам мястэчка Янам Завішай. Адасоблены ад забудовы прамавугольным скверам. Перад касцёлам пастаўлена драўляная каркасная двух’ярусная званіца — твор народнага дойлідства.

Помнік архітэктуры класіцызму. Да асноўнага падоўжнага зруба, які пераходзіць у пяцігранную апсіду, далучаны бакавыя крылы трансепта, што надае храму крыжовы план. Двухсхільны гонтавы дах выходзіць на галоўны фасад трохвугольным франтонам, які разам з дзвумя мураванымі калонамі глыбокай лоджыі стварае своеасаблівы порцік, завершаны васьмігранным барабанам з крыжом над пакатым шатровым пакрыццём. Імкненне ўвасобіць у дрэве формы мураванай архітэктуры праявілася ў нетрадыцыйнай для драўлянага дойлідства арачнай форме аконных праёмаў, імітацыі пілястраў у іх прасценках, вылучэнні шалёўкай фрызавай часткі фасадаў.

Унутраная прастора падзелена калонамі дарычнага ордэра на тры нефы. У цэнтральны неф аркадамі адкрываюцца бакавыя галерэі і хоры. Асноўны пластыка-дэкаратыўны акцэнт малітоўнай залы — галоўны алтар, выкананы ў класічным стылі каланадай з антаблементам такога жа дарычнага ордэра. Абразы 18 ст. «Маці Божая Ларэтанская» і «Святая Кацярына».